समाजवादी जागरण यात्रा-२०८० आजदेखि सुरू

 

काठमाडौँ । नेकपा (एकीकृत समाजवादी) ले आयोजना गरेको समाजवादी जागरण यात्रा -२०८० आजदेखि सुरु हुने भएको छ । 

आइतबारदेखि सुरु गर्ने समाजवादी जागरण यात्रा २०८० मा सहभागी हुन केन्द्रीय नेताहरू शनिबार झापा पुगिसक्नु भएको छ । 

‘सुशासन, रोजगारी र समृद्धिु भन्ने मूल नाराका साथ असोज १४ गतेदेखि मेचीको काकडभिट्टाबाट शुभारम्भ हुने ‘समाजवादी जागरण यात्रा २०८० लाई सफल पार्न पार्टी नेता, कार्यकर्ता र समर्थकहरूको उल्लासमय सहभागिता हुने अपेक्षा गरिएको छ । 

असोज १५ गते इटहरी, इनरुवा, भारदह, राजविराजमा सभा हुनेछन् । १६ राजविराज, छिन्नमस्त, अर्नाह, भगवानपुर, सिरहा सदरमुकाम, बन्दीपुर र जदुकुहामा सभा आयोजना हुने कार्यक्रम रहेको छ । १७ असोजमा जनकपुरमा पत्रकार सम्मेलन हुने र त्यसपछि सोही दिन जलेश्वर, ढल्केबर, बर्दिबास र लालबन्दीमा सभा हुनेछ । १८ असोजमा गरुडा, हर्नैया, कलैया र वीरगन्जमा सभा हुनेछ। त्यस्तै १९ असोजमा पथलैया, हेटौँडा, मनहरी, भण्डारा र भरतपुरमा सभा आयोजना हुनेछ ।

असोज २० मा कावासोती, बर्दघाट र परासी तथा २१ असोजमा भैरहवा र बुटवलमा सभा आयोजना हुनेछ । त्यस्तै सैनामैना, चन्द्रौटा, भालुवाङ, लमहीमा २२ असोजमा र घोराही, तुल्सीपुर र कोहलपुरमा २३ असोजमा सभा आयोजना हुनेछ ।

अभियानअन्तर्गत २४ असोजमा नेपालगन्ज, खजुरा, मैनापोखरा र गुलरियामा तथा २५ असोजमा राजापुर र टीकापुरमा सभा गर्ने एकीकृत समाजवादीको कार्यतालिका छ। त्यस्तै २६ असोजमा लम्की, सुख्खड, अत्तरिया र धनगढी तथा २७ असोजमा पुनर्वास, झलारी, लालपुर र महेन्द्रनगरमा सभा हुनेछ भने २८ असोजमा छिन्चु र २९ गते सुर्खेतमा अभियानअन्तर्गतका सभा आयोजना हुने पार्टीले जनाएको छ ।